Aasiaat - Kommune Qeqertalik Aasianni bychefissarsiorpoq

Aqutsisutut misilittagaqarpit, suliffeqarfiup iluani ineriartortitsilluarsinnaasoq, aningaasaqarnikkut aqutsillaqqissoq sullissinermilu pitsaassutsimik qularnaarillaqqissoq? Suliffeqarfimmi politikkikkut aqunneqartumi qitiusumi inissisimaffimmi aqutserusussuseqarpit, innuttaasunillu kiffartuussinerup pitsaasuunissaanik qularnaarinninniarnermi siuttuullutit? Taamaappat, taava Aasianni illoqarfimmi pisortatut atorfik ilinnut periarfissatsialaavoq!

Atorfik pillugu

Aasianni illoqarfimmi pisortatut kommunip ingerlatsiviani qitiusumik inissisimaffeqassaatit allaffissornikkut pisortatut illoqarfimmut nunaqarfinnullu pingasuusunut, tassa Akunnaaq, Kitsissuarsuit aamma Ikamiut. Kommunip iluani suliffeqarfiup naammassisaqarluarfiusumik ingerlanneqarnera ineriartortinneqarneralu qulakkeerniarlugu akisussaaffigissavat, sulisitsineq, aningaasaqarnermik aqutsineq suliassanillu suliarinninnernik nakkutilliineq ukkataralugit.

Kommunimi pisortaanermut toqqaannartumik sulisitsisorissavat, Kommune Qeqertalimmilu aqutsisoqatigiinni akuussallutit. Pingaarnertut suleqatigissavatit Kangaatsiami, Qeqertarsuarmi Qasigiannguanilu illoqarfiup pisortai, kommunip immikkoortortaqarfiini aqutsisut, soorlu politikkikkut allattoqarfimmi, aningaasaqarnermut, aningaasarsianut, sulisoqarnermut qarasaasiaqarnermullu immikkoortortaqarfinni pisortat, kiisalu kommunimi sulianut immikkut ilisimasallit sulianillu ataqatigiissaarisut siunersioqatigisassallugit.

Akisussaaffitit

·Aasianni nunaqarfittaanilu allaffissornikkut aqutsinermi pisortaassaatit.

·Aasianni allaffissornikkut missingersuutinut akisussaassaatit kiisalu aningaasaqarnerup aqunneqarneranut periusissiornermi peqataassallutit.

·Sullissinerup pitsaassusaa nakkutigissavat inatsisillu eqqortumik malinneqarnissaat qulakkeerlugu.

·Politikikkut aalajangikkanik periusissianillu atuutilersitsineq.

·Pisariillisaanikkut nukissanik atuilluarneq suleriaatsinillu pitsanngorsaaneq.

·Qarasaasiatigut atortorissaarutinik systeminik eqqortumik atuinissamik qulakkeerinninneq sulianillu uppernarsaasersuutinik torersumik isumaginninneq.

Suliassatit pingaarnerit

·Suliffeqarfik 376-nik sulisulik siulersorlugulu ineriartortinnissaa.

·Aasianni nunaqarfiinilu innuttaasunut 3.184-inut (2024-imi kisitsisit) kommunip sullississutaanik isumaginninnissamut akisussaaffiginninnissaq.

·Suliassaqarfiup iluani ineriartorneq pissutsillu atuutileriartortut pillugit pisortaanermut ilisimatitsisarnissaq.

·Suliniutit, angusat missingersuutillu akornanni ataqatigiissitsinerup pilersinneqarnissaanut suleqataanissaq.

·Suliniutit aalajangiinerillu ataqatigiissarneri suliamik ataqatigiissaarisut, pisortaaneq avataanilu suleqatit peqatigalugit.

Ilinnit naatsorsuutigisagut

Sulianut tunngasutigut piginnaasat

·Naleqquttumik qaffasissumik ilinniagaqarsimanissaq imaluunniit pisortat ingerlatsiviini aqutsinermik misilittagaqarluarnissat.

·Pisortat ingerlatsiveqarfiini kommunimilu aqutsinermi inatsisit tunngavissat pillugit sukumiisumik ilisimasaqarnissat.

·Aningaasaqarnermik aqutsinermik, periusissiorluni pilersaarusiornermik suliffeqarfimmillu ineriartortitsinermik misilittagaqarnissat.

Inuttut piginnaasat

·Suleqatigiinnissamut aamma attaveqaqatigiinnissamut nukittuumik piginnaasaqarnissat.

·Tamakkiisumik isiginnissinnaanermik piginnaasaqarnissat aamma ulluinnarni pisoqarfiujuartumi pingaarnersiuisinnaanissat.

·Angusaqarnissamik pingaartitaqarnissaq aamma aaqqiissuteqarnissanik ukkataqarnissat.

Neqeroorutigaagut:

·Pisortatut atorfik namminersorsinnaaffiulluartoq akisussaaffeqarfiusorlu.

·Illoqarfiup nunaqarfiillu ineriartornerinut sunniuteqaqataanissamut periarfissaqarluarfiusoq.

·Sulliffik pikkorissunik pimoorussisunillu sulisulik.

·Aasianni illoqarfimmi aqutsisooqataasunut pisortaanermullu qanittumik nukittuumillu suleqataalernissamut periarfissalik.

·Kommunip immikkoortortaqarfiinik, suliamik ataqatigiissaarisunik immikkullu ilisimasalinnik qanittumik siunersioqateqarsinnaaneq, taakkunanngalu ikorfartorneqarsinnaaneq.

·Aqutsisutut ineriartoqqissinnaaneq aamma misilittagalimmik tapersersorteqarnissamut periarfissaqartitaaneq.

·Atorfik akissaatit allassimaffianni Lønramme 38-mi inissisimavoq akissarsiat tamakkiisut ukiumut 758.043 kr.-iullutik.

Pineqaatissinneqarsimannginnermut uppernarsaat

Una atorfik pinerluuteqarsimannginnermut uppernarsaammik pissarsiornissamut piumasaqaatitaqarpoq. Inatsit naapertorlugu atorfinitsinneqarneq aatsaat pisinnaavoq pinerluuteqarsimannginnermut uppernarsaammik kommune tigusaqarsimappat. Taamaattumik malugeqqussavarput, kommune Politiinit pineqaatissinneqarsimannginnermut uppernarsaat naammaginartoq tiguppagu aatsaat atorfinitsinneqarnissaq isumaqatigiissutigineqarsinnaammat.

Inissaq

Atorfimmut atatillugu inissamik innersuussisoqarsinnaavoq, tassungalu qularnaveeqqut, ineqarnermut akiliutit, atuineq il.il. akilerneqartassapput, Kalaallit Nunaanni Namminersorlutik Oqartussat Kommunit il.il. inissiaataanni najugalinnik ineqarnermut akiliuteqartitsisarneq pillugu malittarisassat sukkulluunniit atuuttut naapertorlugit. Ineqarnermut akiliutit pillugit annertunerusumik paasisaqarniaraanni, atuineq il.il. ilanngullugit uunga innersuussisoqarpoq: ini@ini.gl.

Atorfimmut atatillugu inissiamik ataavartumik atorfinitsitaanerup kinguninnguagut attartorneqartussamik attartortitsisoqarsinnaanngippat, sulisut utaqqiisaasumik ineqarsinnaatitaasut, utaqqiisaasumik inissaannik neqeroorfigineqassapput, tassungalu A-skat sulitilluni ajunngittorsianut akileraartoqartassaaq inatsit atuuttoq naapertorlugu.

Qaqugukkut atorfik aqqutigalugu inissamik tunisinnissaq apeqqutaalluni atorfimmi aallartinnissaq aaqqinneqarsinnaavoq. Malittarisassat atuuttut malillugit atorfininnermi angalanermut akiliussisoqassaaq aamma pequtit assartorneqarnerat akilerneqassaaq.

Atorfeqarnerup uninnerani, atorfik aqqutigalugu inissiaq qimanneqassaaq.

Paasissutissat amerlanerit

Atorfik pillugu paasisaqarnerorusukkuit, Qeqertarsuarmi illoqarfiup pisortaa Benedikte Mølgaard, e-mail benm@qeqertalik.gl imaluunniit Aningaasaqarnermut

pisortaq Nicolai Odgaard Jensen noj@qeqertalik.gl attavigisinnaavatit.

Atorfinitsitsiniarnermut atatillugu inuttut isumaliortaatsikkullu qinnuteqartut ilaannik misilitsitsisoqarsinnaajumaarpoq.

Kommune Qeqertalik pillugu:

Kommune Qeqertalik 5.977-t miss. innuttaqarpoq (2024-imi kisitsisit), taakku kommunimi illoqarfinnut aamma nunaqarfinnut siammarsimapput. Kommune sisamanik illoqarfeqarpoq aamma arfineq pingasunik nunaqarfeqarpoq. Illoqarfiit: Aasiaat, Qasigiannguit, Qeqertarsuaq, Kangaatsiaq. Nunaqarfiit: Niaqornaarsuk, Attu, Ikerasaarsuk, Akunnaaq, Iginniarfik, Ikamiut, Kitsissuarsuit, Kangerluk

Aasiaat pillugu:

Kommune Qeqertaliup qitiusumik allaffeqarfia Aasianniippoq. Aasiaat tassaavoq Kalaallit Nunaanni illoqarfiit annerpaat tallimaattut inissisimasoq, kiisalu illoqarfik qeqertarpassuit pukkitsut akornata uummataanni qeqertatut inissisimavoq. Aasiaat Qeqertarsuup Tunuata kujasinnerusortaani qeqertamiippoq. Annertunerusumik ilinniarfeqarfittut, piorsarsimassutsikkut kiisalu nipilersornikkut Kalaallit Nunaanni sunniuteqarluartutut illoqarfiup Aasiaat tusaamaneqaatigai. I Aasianniippoq Avannaani Ilinniarnertuunngorniarfik (GU),illoqarfimmilu ukiut tamaasa aaqqissuussinerit angisuut tusaamaneqarluartut ilaat makkuupput: Midnight Sun Marathon aamma Nipiaa Rock Festival

Qinnuteqaativit tigunissaanut qilanaarpugut.

Qinnuteqartitsineq qinnuteqarnissamullu killigititaq:

Qinnuteqaat, CV, ilinniarsimanermut aamma pikkorissarsimanermut uppernarsaatit, kiisalu pappiaqqat attuumassutillit una toorlugu nassiutikkit

"Atorfik una qinnuteqarfigiuk"

E-mail allakkalluunniit atorlugit qinnuteqaatinik tigusineq ajorpugut. Attaveqaatit atorlugit atorfiup qinnutiginissaa ajornartorsiutigigukku, taava kommunimi sulisoqarnermut immikkoortortaqarfik saaffigisinnaavat una e mail atorlugu: hr@qeqertalik.gl

2025-imi februaarip naanerani qinnuteqarsimasunik oqaloqatiserinnittoqarumaarpoq.