AC fuldmægtig/specialkonsulent

Kommune Kujallermi inuussutissarsiutinik ineriartortitsinermut peqataarusuppit? AC-fuldmægtigimik pikkorissumik pissarsiorpugut. Qinnuteqartoq tulluuttunik piginnaaneqarlunilu misilittagalik, sukumiisumik naliliineq aallaavigalugu immikkut siunersortitut atorfimmik neqeroorfigineqarsinnaavoq.

2022-mi oktobarip aallaqqaataani, isumaqatigiissuteqarnikkulluunniit atorfinititsisoqassaaq. Suleqatissatsinnik ineriartortitserusulluinnartumik inuussutissarsiortullu atugarissaarnerulernissaannik pingaartitsisumik pissarsiorpugut.

Kommunip inuussutissarsiutinik ineriartortitseqatigiiffianik, Innovation South Greenlandimik (ISG), kiisalu najukkami suliffeqarfinnik suleqateqarneq Kommune Kujallermit pingaartinneqarluarpoq. Qaqortumi mittarfiliortoqartussanngormat nunatsinni kommunit kujallersaanni ineriartorneq pissanganartoq ataatsimoorluta sammivilerniartussanngorparput. Kommune Kujalliup inuussutissarsiutit pingaarnerit sisamat suussasut aalajangersimavai, tassaasut Takornariartitsineq, Inuussutissalerineq, Aalisarneq Aatsitassarsiornerlu, ukiunilu aggersuni annertuumik ineriartortinneqartussat, kiisalu ikinngitsunik aningaasaliiffigisariaqartut.

Taamaaliornissatsinnut pikkorissumik suleqateqartariaqarpugut, taanna ISG-ip, inuussutissarsiortut kommunillu akornanni attaveqaataassaaq. Suliani inuussutissarsiornermut tunngasuni tamani kommunip suliassalerisorissavaatit kiisalu suliat politikkikkut oqaluuserineqarneranni allaffissornikkut suliarineqarnerat qularnaassallugu.

Kommune Kujallermi nunarsuarmioqatigiinnut kingornutassiaqarfiit pillugit aqutsinermut pilersaarut ilisimatusarnikkut, piujuaannartitsinikkut, ineriartortitsinikkut takornariartitsinikkullu pissanganartunik periarfissiipput. Kujataa World Heritagemut kommunip attaveqaatigissavaatit suliami tamatumani kommune malinnaasinnaaqqullugu pisussaaffimminillu naammassinnissinnaaqqullugu.

Aatsitassarsiulernissaq siunertaralugu Kujataani aatsitassaqarneranik misissueqqissaarnerit ingerlanneqarsimapput. Illittaaq suliassaraat tamatumani kommunip siunnersortai suleqatigissallugit politikkikkut anguniakkat malersorneqaqqinnissaat siunertaralugit.

Atorfimmi pisortaaneq qaninnertut qullersarineqassaaq.

Atorfik:

Atorfik nutaajuvoq tamatigoortuullunilu, utaqqiinarpaatillu. Suliassarissavatit suleqatinut attaveqarneq, suliassaqarfimmi ineriartortitsinermut pilersaarusiornermullu peqataassallutit, inuussutissarsiornermut tunngasutigut qinikkanut suliassanngortitaasut tamaasa suliarisassavatit taavalu nunarsuarmioqatigiinnut kingornutassiaqarfittut toqqakkanut tunngatillugu kommunip suliassaanut tunngasunik suliaqartassallutit. Inuussutissarsiortunut aningaasalersueriaatsinik tapiissuteqarfissanillu misissuisartussaagavit tamatumuunakkut misilittagaqarneq iluaqutaassaaq. 

Kommunimi massakkut aaqqissugaanermik allanngortiterisoqalermat inuussutissarsiornermut tunngasut aningaasaqarnermut ataatsimiititaliap ataaniilertussaapput. Taamaalillutit kommunip aqutsisuinut qullerpaanut qanimut oqaloqatiginnittassaatit.

Suleqatigiit persuarsiorfiunngitsut, suleqatigiinnermut sammisut kiisalu ulluinnarni ulapaartut pissangartunillu suliallit peqataaffigissavatit. 

Suliatsinnut tunniusimalluartuuvugut kiisalu suliassat suliassaqarfitsinnut ilaalluinnanngikkaluit pillugit akisussaaffimmik tigusisarpugut.

Naatsorsuutigaarput:  

• Naleqquttunik ingerlaqqiffiusumik ilinniagaqarsimasutit.
• Suliassanik ingerlatsinermik / aqutsinermik misilittagaqartutit.
• Suliffimmi politikkikkut aqutaasumi sulinermik misilittagaqartutit.
• Suliffeqarfinnik suleqatinillu allanik oqaloqateqarneq nukissanik pissarsivigisarit
• Pitsaasumik kukkuneqanngitsumillu allattartutit
• Suliassat assigiinngissitaartorpassuit ataatsikkut suliarisinnaagitit, taavalu ilaanni aalajangersimasumik periuseqarlutillu pilersaaruteqarlutillu sulisinnaasartutit, ilaannilu pissutsit atuuttut aallaavigalugit suleriaaseqartarlutit.
• Suliassani ilungersunartut periarfissanik takunnissinnaassuseqarpit kiisalu suleqatinnut suliassanullu paasinnittumik alapernaatsumillu pissuseqarpit

Kissaatigaarput:

• Inuiaqatigiit kalaallit sukumiisumik ilisimasaqarfigigitit
• Nammineq suliassannut piffissaliussanullu akisussaassuseqartutit
• Suliassaqarfiit assigiinngitsut tapertaralugit sulisinnaasutit
• Suliassaqarfiit aaqqitassallu nutaat pilertortumik iserfigisinnaagitit
• Patajaatsuusutit qiimasuullutillu

Akissarsiatigut atorfeqarnermilu atugassarititaasut

Akissarsiat atorfeqarnermilu atugassarititaasut, soorlu akiliunneqarluni atorfeqarnermi soraarnermilu angalanissamut pisattallu nassiunneqarnerannut pisinnaatitaaffiit, Kalaallit Nunaanni Namminersorlutik Oqartussat kiisalu kattuffiup isumaqatigiinniarsinnaatitaasup akornanni isumaqatigiissutit atorfininnerup nalaani atuuttut naapertorlugit pissapput.

IneqarneqAtorfimmut tunngatillugu inissaqartitsisoqassaaq, taanna maleruagassat atuuttut naapertorlugit akilerneqartassaaq. Inissamulli utaqqineq pisinnaavoq. Utaqqinermi kommune utaqqiisaasumik ineqartitsisinnaavoq, maleruagassallu atuuttut naapertorlugit akiliisoqartassaaq.

Atorfik pillugu paasissutissat sukumiinerusut uunga saaffiginninnikkut pissarsiarineqarsinnaapput: Tine Pars, mail tipa@kujalleq.gl imaluunniit oqarasuaat. +299 64 53 10

Kommune Kujalleq Kalaallit Nunaanni kommunit kujallersaraat 6.439-inik inoqartoq (2020) katillunilu 53.000 km2-inik angissuseqartoq. Taamaammat Kalaallit Nunaanni kommunit minnersaraat.

Kommune pingasunik illoqarfeqarpoq, tassa Nanortalik, Qaqortoq kiisalu Narsaq, nunaqarfiit 11-it kiisalu nunaleriviit 37 (savaateqarfiit, tuttuuteqarfiit nersussuaateqarfiillu).

Kommune pillugu paasissutissat sukumiinerusut nittartakkatsinni pineqarsinnaapput https://www.kujalleq.gl/Emner/Om%20kommunen?sc_lang=kl-GL 

Qinnuteqaat, pineqaatissinneqarsimannginnermut uppernarsaat, ilinniagaqarsimanermut paasissutissat suliffigisimasallu nalunaarsornerat kiisalu soraarummeersimanermit uppernarsaatit assilineri il.il. PDF-filinngorlugit kommunip nittartagaatigut nassiunneqariissapput kingusinnerpaamik  25. august 2022.

MALUGIUK: Qinnuteqaatit pappilissatigut e-mailikkulluunniit tiguneq ajorpagut, inussiarnersumik qinnuteqaatit PDF-fil-inngorlugu nittartagaq aqqutigalugu nassiunniunneqassapput.

”Inuit peqqinnerulernissaat aallukkumallugu kommunimi sulinerup nalaani pujortartoqartannginnissaa Kommune Kujallermiit atuutsinneqarpoq. Tamanna januaarip aallaqqaataani 2018-imi atuutilerpoq. Paasissutissat sukumiinerusut Sulisoqarnermut Immikkoortortaqarfimmut piniarneqarsinnaapput ”