Afdelingschef til Renoveringssekretariatet
Namminersorlutik Oqartussat
Nuuk
Ikkunneqarpoq: 13-12-2024
Piffissaq atuuffissaa naassaaq: 03-02-2025
Suliffissamut ID normut: LJA-85857063
Atorfeqarnermi atugassarititaasut: Tamakkiisoq
Suliassaqarfik: Assassorluni sulineq & sanaartorneq
Ineqarnermut Attaveqaasersuutinullu Naalakkersuisoqarfik Iluarsaassinernut Allattoqarfimmi immikkoortortamut pisortassamik piginnaanilimmik tunniusimasumillu pissarsiorpoq. Immikkoortortami pisortatut Namminersorlutik Oqartussat inissiaataanni pitsaasumik iluarsaassinissamut aserfallatsaaliuinissamullu, Kalaallit Nunaanni inuiaqatigiinnut naalakkersuinikkullu oqallisaasunut annertuumik pingaaruteqartunut qitiusumik inissisimalissaatit. Atorfik aqutsinermut piginnaaneqarluarnissamik, periusissianik paasinnissinnaanissamik aammalu teknikkimut tunngasunik ilisimasaqarnissamik pisariaqartitsiffiuvoq.
Iluarsaassinernut Allattoqarfik pillugu
Iluarsaassinernut Allattoqarfik Ineqarnermut Attaveqaasersuutinullu Naalakkersuisoqarfimmi immikkoortortat sisamaasut ilagaat. Immikkoortortaqarfiup Namminersorlutik Oqartussat nuna tamakkerlugu pigisaani nalilinni iluarsaassinerni, aserfallatsaaliuinerni isaterinernilu Namminersorlutik Oqartussat sanatitsisutut inissisimanerannut akisussaasuuvoq. Suliassat naalakkersuisoqarfiit attuumassutillit, aningaasaliissutinik atugassiisut suleqatigalugit tulleriiaarneqartarput.
Naalakkersuisoqarfimmi immikkoortortaqarfiit akimorlugit suleqatigiinneq pingaaruteqarpoq, pingaartumik Sanaartornermut Immikkoortortaqarfik, Namminersorlutik Oqartussat nutaanik illuliortiterneranni sanatitsisutut inissisimanermik isumaginnittuusoq eqqarsaatigalugu. Ataqatigiissaarinermi najukkani pissutsit, ukiup qanoq ilinera apeqqutaatillugu unammilligassat aammalu najugaqarfinni assigiinngitsuni isumalluutit paasisimaarinissaat pisariaqarpoq. Taamaattumik pitsaasumik periusissiorfiusumillu suliassanik naammassinninnissap qulakkeernissaanut pingaarutilimmik inissisimasussaavutit.
Akisussaaffeqarfiit
Immikkoortortaqarfimmi pisortatut Iluarsaassinernut Allattoqarfimmi aqutsinissaq ineriartortitsinissarlu pingaarnertut akisussaaffigissavatit. Tamatuma nassatarisaanik sulisunik aqutsineq periusissiorlunilu sulianik aqutsineq suliarissavatit. Immikkoortortaqarfimmi pitsaasumik anguniagaqarfiusumillu suliassanut pilersaarusiortarneq suliassanillu tulleriiaarisarneq, kiisalu tamatumunnga atatillugu aningaasaqarnermik aqutsineq qulakkeertassavatit. Akisussaaffinnut aamma apeqqutinik pisariusunik, teknikkimullu tunngasunik aalajangiisartunut suliakkiisartunullu, amerlanertigut teknikkimut tunngasunik paasisaqarneq ajortunut ingerlatitseqqittarneq ilaatinneqarput.
Tamatuma saniatigut immikkoortortaqarfimmi suliat aallaqqaataaniit naggataanut suliarineqarnerinut qulakkeerisarnissamut akisussaasuussaatit, tassungalu siunnersortinik, oqartussaasunik entreprenørinillu, minnerunngitsumillu naalakkersuisoqarfinnut suliakkiisuusunik suleqateqarneq ilaatinneqarput. Sulianni pingaarutilittut aaqqiissutissanik nutaaliorfiusunik ineriartortitsinermut suliassanillu malitassanik, immikkoortortaqarfimmi nunatsinnilu illuliortiternermik sanaartornermillu inuussutissarsiuteqartuni suliassanut pitsanngorsaataasussanik pilersitsisarnermut sinaakkutissanik pilersitsinissaq inissisimavoq.
Ilinnut tunngasut
Immikkoortortaqarfimmi pisortassamik, suliatigut nukittuunik tunuliaqutaqartumik, aammalu sulisunik aqutsinermi suliassanillu aqutsinermi misilittagaqarluartumik pissarsiorpugut. Misissueqqissaarsinnaassaatit, aammalu aaqqissuussaanermi politikkikkut aqunneqartumi aqqutissarsiorsinnaassallutit. Aamma atorfimmi attaveqaqateqarsinnaanermut piginnaaneqarluarnissat, aammalu qulequttanik teknikkikkut pisariusunik ersarissumik paasiuminartumillu suliaqartunut ingerlatitseqqissinnaanissat pisariaqartinneqarpoq.
Teknikkimut tunngasumik attuumassutilimmik ilinniagaqarputit, aningaasanik aqutsineq misilittagaqarfigaat, aammalu suliassaqarfimmi neqerooruteqartitsisarnermut maleruagassat, teknikkimut peqqussutit inatsisillu ilisimaaraatit. Iluarsaassinermik aserfallatsaaliuinermillu suliaqarnermut misilittagaqarnissat, nunatsinnilu illuliortiternermik sanaartornermillu inuussutissarsiuteqarnermik ilisimasaqarluarnissat pingaaruteqarpoq.
Inuttut piginnaasat eqqarsaatigalugit pisortamik, sulisut akornanni pitsaasumik suleqatigiinnissamut kaammattuisinnaasumik sullivimmilu avatangiisinik pitsaasunik pilersitsisinnaasumik pissarsiorpugut. Aqutsinikkut suliatigullu suliassat pisariusut naammassisinnaassavatit, aammalu angusassat aaqqiissutissallu nutaaliorfiusut aallussinnaassavatit.
Suleqatigiinneq oqaloqatigiinnerlu
Suleqatigiinneq atorfimmi qitiusunut ilaavoq, aammalu suliffeqarfiup iluani avataanilu suleqatit qanittumik oqaloqatigineqarsinnaanissaannik qulakkeerisinnaassaatit. Tassunga naalakkersuisoqarfiit, siunnersortit entreprenørillu ilaatinneqarput. Aamma suliassani immikkut ittuni atuisunik oqaloqateqarsinnaanissat pingaaruteqarpoq.
Tamatuma saniatigut nuna tamakkerlugu suliassanik ataqatigiissaarinerup pitsaasuunissaanik qulakkeerisassaatit, aammalu najugaqarfinni assigiinngitsuni pissutsit immikkut ittut eqqarsaatigisassavatit, taakkununngalu najukkami sanasut aamma ukiup qanoq ilinera apeqqutaatillugu unammilligassat ilaatinneqarput.
Aqutsinermi tunngavissat ineriartornerlu
Namminersorlutik Oqartussani pisortatut Namminersorlutik Oqartussani aqutsinermi tunngavissat naapertorlugit sulisinnaanissat naatsorsuutigineqarpoq. Pikkorissarnerni ineriartortitsinernilu attuumassuteqartuni peqataanissamut periarfissaqassaatit. Aqutsisutut piginnaasat ingerlaavartumik naliliiffigineqartarput, tassungalu ilaatinneqassaatit, aammalu akissuteqarnissamut ammanissat piginnaaneqarfinnillu ineriartortitseqqinnissamut kissaateqarnissat pingaaruteqarpoq.
Qinnuteqarnissamut februarip 3-ani 2025 killiliunneqarpoq. Atorfik pillugu amerlanerusunik paasisaqarusukkuit Naalakkersuisoqarfimmi pisortaq Ruth Lindhardt telefon 34 54 53-imut imaluunniit e-mail rli@nanoq.gl aqqutigalugu attaveqarfigisinnaavat, kisiannili 18. decembari 2024-miit 13. januaari 2025-mut pisortap tullia Embla Kristjansdóttir 34 54 36-mut, imaluunniit e-mail emki@nanoq.gl aqqutigalugu attaveqarfigeqquneqarpoq.
Atorfimmut qinnuteqarninni qinnuteqaatit, CV-t uppernarsaatillu inuttassarsiuinermi uagutsinnut attaveqarfissaq aqqutigalugu nassiutissavatit. Malugiuk, qinnuteqaatinik e-mail-ikkut tigusineq ajoratta.
Soqutiginnippit?
Atorfik pillugu apeqqutissaqaruit, Flies HR-imi Senior Sales & Recruiter Jørgen Juel Jessen mobil 53 15 11-imut imaluunniit jessen@flieshr.dk aqqutigalugu attaveqarfigisinnaavat.
Flies HR-ip atorfinnik inuttassarsiuinerit isumagisarpai, taamaattumillu saaffiginnissutit tamarmik tassunga nassiunneqassapput. Qinnuteqartunik piukkunnaatilinnik oqaloqatiginninnissamut ingerlaavartumik aggersaasarpugut.
Tusarfiginissat qilanaaraarput.
Akissarsiat atorfeqartitaanermilu atugassarititaasut:
Piaartumik sukumiisumillu isumaqatigiissuteqarnikkut atorfinitsitsisoqassaaq. Atorfik akissaateqarfik 38-mi inissisimaffiup assinganiippoq, aammalu 1. apriili 2022 aallarnerfigalugu akissarsiassaapput qaammammut: 56.910 aamma ukiumut: 682.930.
Atorfinitsitsinermi isumaqatigiissutini piumasaqaatit tunngavigineqassapput, taammalu sapaatit akunnerannut piffissaq suliffiusussaq tunngaviusumik nal. ak. 40-nik sivisussuseqarpoq. Malugalugu, sivisunerusumik sulinermut imaluunniit sulinngiffissanik annaasaqarnermut akissarsiaqartitsisoqassanngimmat.
Akissarsianut atorfininnermullu atugassarititaasunut, taakkununngalu atorfininnermi soraarnermilu angalanernut pequtinillu nassiussinernut akiliunneqarsinnaatitaanermut piffissami atorfiniffiusumi Namminersorlutik Oqartussat aamma kattuffiup isumaqatiginninniarsinnaatitaasup ilaasortaaffigisap akornanni atuuttut malinneqassapput.
Aallaaviatigut isumaqatigiissutini atugassarititaasut naapertorlugit atorfinitsitsisoqassaaq, qinnuteqartoq tjenestemandi-tut atorfeqareersimaguni Nunatsinni pisortani tjenestemandit pillugit inatsisit malillugit tjenestemandinut atugassariti-taasut naapertorlugit atorfinitsinneqarsinnaavoq.
Atorfimmut atuuttoq tassaavoq, piffissap suliffiusussap qanoq sivisutiginissaa killilersugaanngimmat, aammalu qaangiuttoornermi ajunngitsorsiassat akilerneqarnissaat ullullu sulinngiffissat annaaneqartut ajunngitsorsiassarsissutiginissaat atorneqarsinnaanngillat.
Piffissap suliffiusussap sivisussusissaa aallaavittut sapaatip akunneranut nalunaaquttap akunnerinik 40-nik sivisussuseqarpoq.
Akissarsianut atorfeqartitaanermullu tunngasutigut piumasaqaatit, taakkununnga ilanngullugit atorfinikkiartorluni soraarlunilu angalanermut aamma pequtit nassiunneqarnerinut akiliunneqarsinnaatitaaneq, Namminersorlutik Oqartussat aamma pineqartup kattuffiata isumaqatigiinniarsinnaatitaasup akornanni isumaqatigiissutit piffissami atorfiniffiusumi atuuttut naapertorlugit pissapput.
Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.