Malugiuk atorfimmut allagarsiissutaasumut matumunnga piffissaliussaq naareerpoq!
Atorfimmut allagarsiissutaasumut qinnuteqarnissamut piffissaliussaq qaangiutereerpoq, aammalu atorfik qinnuteqarfigineqarsinnaajunnaareerppoq. Allagarsiussaq innersuussivittuinnaq takutinneqarpoq.

Nuna tamakkerlugu digitaliseriinermut AC-mik suleqataasussamik pissarsiorpugut

Namminersorlutik Oqartussat

Nuuk
20-09-2022
Piffissaq atuuffissaa naassaaq: 18-10-2022
Suliffissamut ID normut: LJA-84048443
Suliassaqarfik: IT & tusagassiuutit

Innuttaasut atorfeqartullu oqartussaqarfinnut attaveqartarneri pisariinnerulersikkusullugu oqartussaqarfiit attaveqarfigeriaannaanissaat sulissutigissallugu uummateqarfigaajuk? Anguniagaq tamakkiisumik takusinnaaviuk, immikkoortualuillu attuumassuteqarfigisaat ataatsimut takusinnaallugit? Kattuffiit suliassaqarfiillu akimorlugit pilersaarusiorsinnaavit, ataqatigiissaarisinnaavit sulisinnaallutillu? Inuiaqatigiit aaqqissuussaanerannut ataqatigiinnerannullu ilisimasaqarpit? Taava illit pisariaqartippatsigit.

Digitalimik Sullissinermut Aqutsisoqarfimmi Suliniummut Immikkoortortaqarfimmi AC-mik Suliniummut ingerlatsisussamik pissarsiorpugut.

Nuna tamakkerlugu digitaliseriinermut attuumassutilinnik suliniutinik ingerlatsivugut, maannakkullu nuna tamakkerlugu ataatsimut oqartussaqarfiit suliniutaat periusaallu suliarileruttorpagut, tamaattumik ataatsimut isiginnissinnaassuseqassaatit, takusinnaassallugulu suliavit ataatsimut suliniutigineqartumut attuumassuteqarnerat. Suliniutit ingerlatagut ilaat tassaapput: Kalaallit Nunaanni tunngaviusumik paasissutissanut programiliorneq suliniutillu, suliffeqarfinni suliniutit ilanngullugit – soorlu ISO 27001-mik atuutsitsilerneq, sullissivik.gl-imi uanga qupperneramik suliaqarneq taakkualu saniatigut suliniutinik aallartitsisoqannginnerani, suliniummik aallartitsisoqartariaqarnersoq nalilersorniarlugu misissuinermik ingerlatsisarluta.

Digitaliseriinermi inuit allannguinerlu isiginiarneqartarput, taamaattumik pingaaruteqarpoq allannguinermi aqutsisinnaanissat suliniutigisannullu soqutigisalinnik suleqateqarsinnaanissat. Allannguinermi suliniummillu aqutsinermi attaveqallaqqissuunissat piumasaqaatigaarput, taamaattumik attaveqariaaseq pissusissamisuuginnartutut pigissavat.

Atuisut qitiutillugit sulivugut, taamaattumik atuisunut atugassarititaasut ilanngunneqarnissaat paasisinnaassavat, allannguisoqarneranilu taakkua aqqutissiuutissallugit.

Digitalinut paasinnissinnaassuseq soqutigisaqarnerlu iluaqutaassapput. Suliariligassatsinnut iseriartuaartinneqarumaarputit, tamaaattumik naatsorsuutiginngilarput digitalimut tunngatillugu pikkorinnerpaanissat.

Misissuisinnaassuseq, attaveqarsinnaassuseq, ataqatigiissaarinnissinnaassuseq kiisalu akademiskimik ilinniarsimanermi piginnaasat atorfimmi pingaartinneqarput. Ilisimatusarninnit piginnaanerilersimasatit pingaartippagut. Suliniummik allannguinissamullu ingerlatsisinnaanissannut assigisaannullu sakkussannik tuniorassavatsigit.


Naatsorsuutigaarput:

  • Anguniagaqarlutit sulisinnaanissat ataatsimullu isiginnissinnaassuseqarnissat
  • Ingerlatanik suliniutinillu naammassisaqarsinnaassuseqarnissat
  • Soqutigisalinnik suliffeqarfiup iluaniittunik avataaniittunillu peqataatitsisinnaanissat suleqateqarsinnaanissallu
  • Isumassarsianik, pisariaqartitanik pilersaarusianillu piviusunngortitsisinnaanissat
  • Akisussaaffeqarfivit suliffeqarfimmut attuumassuteqarfianik paasinnissinnaanissat
  • Suliassanik pilersaarusiorsinnaanissat aaqqissuussisinnaanissallu
  • Suliniutinik ingerlatsinissannut oqarfigineqarnissat utaqqiinnarnagu nammineerlutit iliuuseqarsinnaassuseqarnissat
  • Suleriusinik paasiniaasinnaanissat
  • Atuisut pisariaqartitaannik paasinnissinnaanissat
  • Ajornartorsiutinik paasiuminaassinnaasunik paasinartumik oqitsumillu paasissutissiisinnaanissat

Piginnaanerissavatit:
  • Ilisimatusarfimmit ilinniarsimaneq
  • Suliniutinik ingerlatsinermut misilittagaqarneq aammalu suliniutinik aqutsinermi tunngaviusumik sakkussanik atuisinnaaneq. Tamanna piumasaqaataanngilaq, taakkua pillugit piginnaasassanik sakkussanillu tunniussisoqarsinnaavoq.
  • Allannguinermik suliaqarnermik misilittagaqarneq
  • Suliffeqarfimmi suliniutiniluunniit politikkitigut aqutami sulinermik misilittagaqarneq
  • Kalaallisut, danskisut tuluttullu allassinnaallunilu oqaaseqarsinnaaneq

Suleqatissatsinni amigaatigisarput:
  • Qiimasuuvoq ilakkuminartuullunilu – pissuserisatsinnik akuersaartoq
  • Inuit allannguinermut peqataatinnissaannut nukissaqarluarlunilu sulerusussuseqassaaq
  • Ulluinnaat ulapaarfiusut suliffigisinnaassavai
  • Namminersorluni sulisinnaassuseqassaaq, taamaakkaluartoq suleqatigiinnermik suleqatinillu nuannarisaqassalluni
  • Suliassaqarfiit akimorlugit suleqatiginnissinnaassuseqassaaq, suliffeqarfimmilu immikkoortut arlallit – pedellimiit pisortaanermut - oqaloqatigisinnaassallugit
  • Ajornartorsiutinik suliaqarnermi aaqqissuussamik torersumillu suliaqarsinnaassaaq
  • Ajornartorsutinik suussusersisinnaallunilu aaqqiissutissanik ujartuisinnaassaaq
  • Akisussaaffimmik tigusilluni sulianik naammassisaqarsinnaassaaq
  • Sapiissuseqassaaq utaqqisinnaassuseqassallunilu
  • Inuiaqatigiinnut kulturitsinnullu ilisimasaqassaaq
Sulerusussuseqalerpit, takusinnaallugulu illit pisariaqartikkitsigit? Taava periarfissaq tigulluarlugu qinnuteqarit. Inuiaqatigiit digitalikkut aaqqissuussaanerat pitsanngorsaaffigisinnaavat, assigiissaariffigisinnaavat inuiaqatigiinnullu digitalimik ingerlatsinissaq pisariinnerulersissinnaallugu.

Suliniummut immikkoortortaqarfik
Suliniummut immikkoortortaqarfimmi aallussisunik sulisoqarpugut, taakkualu oqartussaqarfinni suliniutigineqartut nuna tamakkerlugu digitaliseriinissamut periusissiamut atassuserlugit suliaraat. Suliniutinik assigiissaarinernut, atuisunut pisariillisaanernut, allannguinernullu attuumassuteqartunik ingerlataqarpugut. Periarfissat amerlasoorpassuupput. Isumassarsiat suleriuutsillu nutaat inissaqartippagut. Isumassarsianik piviusunngortitsinissaq periarfissaqarluarpoq. Pitsaassuseq, suleqatigiinneq best practise-lu sulinitsinni ukkataraagut.

Isumassarsianik suleriuuutsinillu nutaanik misilittaasinnaassuseqarpugut. Suliniutinik ingerlatsisuuvugut – akademiskimik ilinniarsimasagut assigiinngisitaaginnaratik oqaloqatigiinnissanut, ineriartornissamut suliatsinnillu aallussinissatsinnut inissaqartitsivugut.

Digitalimik Sullissinermut Aqutsisoqarfik
Kalaallit inuiaqatigiit pillugit siunissami digitalimik atuineranni isumannaatsuunissaa nalinginnaasumik digitalikkut aaqqiissutinik suliaqarnikkut Digitalimik Sullissinermut Aqutsisoqarfimmit suliarineqarput. Inuiaqatigiit pillugit digitalikkut aaqqiissutit nalinginnaasunngorsakkat qulakkeerniarnerini Aqutsisoqarfik siuttuuvoq.
Digitalimik Sullissinermut Aqutsisoqarfimmi Nunatta digitalinngorsarneqarnera aamma Namminersorlutik Oqartussani IT-mik ingerlatsineq suliarisuuarput. Aqutsisoqarfiup akisussaaffeqarfii annertoorujussuupput, aamma aqutsisoqarfiup eqqortumik sullissineranut soqutiginninneq naatsorsuuteqarnerlu taamaallutik. Nunatta digitalinngorsarneqarnerani pingaarnertut akisussaaffiup isumaginera tulluusimaarutigaarput suliarlu maniguulluta tigummivarput. Suliatigut inuttullu piginnaasaqarluarnissarput piumasarisarparput – taamaammat ulluinnarni ulapittaqalutalu ullullu tamatigoortuusarlutik. Taamaammat suliatigut inuttullu assigiinngissutsit ataqqillugit suleqatigiilluartarnikkut sulisut iluarisimaaruteqartarnissaat anguniagaralugulu suliassat suliarinerini peqataatitsilluartarnissarput qitiutittartarput.

Aqutsisoqarfik aamma nuna tamakkerlugu digitalinngorsaanermut periusissiaq pillugit paasissutissat allat atuarsinnaavatit uani digitalimik.gl
 
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.